Stuðningur fyrir, á meðan og eftir fæðingarorlof

Til að styðja við verðandi og nýbakaða foreldra hefur Ofar sett fram eftirfarandi aðgerðir sem gildir fyrir einstaklinga sem fara í samfellt fæðingarorlof í 6 mánuði eða lengur.

Helga Björg Hafþórsdóttir, Mannauðsstjóri hjá Ofar

Aðgerðirnar skiptast í þrjá hluta: Fyrir fæðingarorlof, í fæðingarorlofi og lok fæðingarorlofs. 

Áður en fæðingarorlof hefst fá verðandi foreldrar hjá Ofar einn greiddan frímánuð fyrir settan dag til að undirbúa og hvíla sig fyrir fæðinguna barnsins. Greidda fríið hefur ekki áhrif á veikindarétt. Starfsfólki býðst einnig styrkur til að sækja námskeið tengt undirbúningi fyrir foreldrahlutverkið og launasamtal áður en fæðingarorlof hefst til að tryggja að launaþróun staðni ekki. 

Á meðan á fæðingarorlofi stendur þá heldur starfsfólkið áfram að safna sumarfrísdögum. Margir nýbakaðir foreldrar standa frammi fyrir því að eiga ekkert sumarfrí inni eftir fæðingarorlof og Ofar vill koma í veg fyrir það. 

Þegar fæðingarorlofi lýkur verður starfsfólki Ofar boðið upp á aukinn sveigjanleika í starfi, til dæmis möguleikann á því að snúa til baka í hlutastarfi. Þetta úrræði getur hjálpað fjölskyldum sem eru að reyna að brúa bilið milli fæðingarorlofs og dagvistunar.